काठमाडौं, ३० साउन । सानो उमेरमै कुशल खेलाडी र स्टार बनेका क्रिकेटर सन्दीप लामिछानेको रंगीन जीवनमा रंगहरु बेरंग भएको लगभग वर्षदिन भयो । क्रिकेटजगतमा राष्ट्रिय र अन्तरारष्ट्रिय रुपमा समेत चर्चा पाइसकेका लामिछानेले हाल क्रिकेट त खेलिरहेका छन् तर मनभरी तनाव र चिन्ता लिएर । तनाव र चिन्ताका बाबजुदपनि लामिछानेको खेलले नेपाली क्रिकेटको अन्तराष्ट्रिय छवीलाई जोगाएकोमात्र छैन बढाएको पनि छ ।
नेपालका लागि ठूलो खेल मानिएको एशियाकपमा नेपालले क्रिकेटका विश्वमहारथीहरु भारत, पाकिस्तान, श्रीलंका लगायत देशसँग प्रतिष्पर्धा गर्नुपर्नेछ । तर, सन्दीपले एशीया कम खेल्छन् वा खेल्दैनन् भन्ने आमचासो र चिन्ता बढेको छ । यता सन्दीप भने मुद्दाको किनारा नलाग्दासम्म मानसिक रुपमा स्वतन्त्र भएर खेल्न सकिरहेका छैनन् । उनका कतिपय सामाजिक संजालका अभिव्यक्तिले उनी निराश र विक्षिप्त भएको हो की भन्ने आशंका पनि पैदा गर्छ ।
तत्कालिन अवस्थामा सन्दीपले थुनामुक्त भएपछि राष्ट्रिय टिममा कमब्याक गर्नुका साथै नेपालका लागि निरन्तर खेलिरहेका छन् । उनको हरेक खेलमा उत्कृष्ट प्रदर्शन पनि भइरहेको छ । नेपाललाई विश्वकपको ग्लोबल क्वालिफायरमा पु¥याउन सन्दीपको ठूलो योगदान रहेको छ । त्यस्तै, नेपालको एक दिवसीय मान्यता कायम राख्न र एसीसी प्रिमियर लिग जित्दै एसिया कपमा भाग लिनपनि सन्दीपकै मुख्य भूमिका रहेको छ ।
काठमाडौं जिल्ला अदालतमा चलिरहेको सन्दीप विरुद्धको मुद्दाको हालसम्म फैसला नहुँदा उक्त बलात्कार मुद्दाका दुवै पक्षले न्यायन पाउन सकेका छैन । जिल्ला अदालतले सन्दीप विरुद्धको मुद्दामा साउन ३० शुक्रवार अर्को पेशी चढाएको छ । यसपाली सन्दीपको मुद्दामा अन्तिम फैसला भए सफाई पाउने वा पुनरावेदन जाने भन्ने अवस्थामा सन्दीप हुनेछन् । तर, यसपाली पनि सुनवाई नभए सन्दीपको मुद्दा थप लम्बिनसक्छ ।
जिल्ला अदालत काठमाडौंले गत असोजमा उनलाई थुनामा राखेर अनुसन्धान गर्न आदेश दिएपनि उच्च अदालत पाटनले सो आदेश उल्टाउँदै सन्दीपलाई रिहा गरेको थियो । पछि सर्वोच्चले उच्चको आदेश लाई सदर गर्दै सन्दीपलाई विदेश गएर क्रिकेट खेल्न समेत अनुमति दिँदा सन्दीपले खेल्न पाएका छन् ।सन्दीपले क्यानडामा आयोजित ग्लोबल टी–२० मा सर्रे जगुअर्सबाट खेलेर उत्कृष्ठ प्रदर्शन गरेका छन् । सन्दीप लामिछानेका कारण नेपालले क्रिकेटको सुधारमा र पहिचानमा ठूलो फड्को मारेको छ । तर, उनी पछिल्लो समयमा बलात्कार मुद्दामा परेपछि उनका समर्थकहरु पनि दुःखी भएका छन् । लामिछानेको दोष भए उनलाई कार्वाही गर्न र नभए सफाई दिने काम छिटो होस् भन्ने सन्दीपका फ्यानहरुको चाहना छ ।
तर, नेपालको कानुन दैवले जानुन भनेकोजस्तो एउटा सार्वजनिक चासोको मुद्दा वर्षदिनसम्म पनि फैसला हुनसक्दैन । ढिलो न्याय अन्याय बराबर नै हुने कानुनी मान्यता छ । कुनैपनि मुद्दामा मुछिएका दुवैपक्ष छिटो फैसला चाहान्छन् । दोषी भेटिए त धेरै प्रश्न नहोला तर, निर्दोष पाइएको खण्डमा यति लामो मानसिक यातना र पीडाको क्षतिपूर्ति सरकारले दिन्छ ? यो प्रश्नपनि महत्वपूर्ण रहेको छ ।
सन्दीपको मुद्दामा पनि फैसला ढिला हुँदा पीडित भनिएकी किशोरी र लामिछाने दुवैलाई सास्ती भएको छ । मुद्दाको फैसला ढिला हुँदा पीडित किशोरीलाई अदालतले एकलाख क्षतिपूर्ती दिनुपर्ने अवस्था आएको छ । शुक्रवार सन्दीपको अन्तिम फैसला हुनसकेमा त्यहि फैसलाले सन्दीपको भविष्य र भाग्य निर्धारण गर्ने देखिन्छ ।
