काठमाडाैं- पूर्वराजा ज्ञानेन्द्र शाह रुपन्देही पुगेका छन् । शुक्रबार रुपन्देही पुगेका शाहलाई भैरहवास्थित गौतमबुद्ध अन्तर्राष्ट्रिय विमानस्थलमा उनका समर्थक, शुभेच्छुक, राष्ट्रिय प्रजातन्त्र पार्टी(राप्रपा)का नेता-कार्यकर्ताका साथै राजाका समर्थकलगायतले स्वागत गरेका छन् ।
गौतमबुद्धको जन्मस्थल लुम्बिनीमा आयोजना गर्न लागिएको पूजा कार्यक्रममा सहभागी हुन पूर्वराजा शाह यहाँ आएका हुन् । लुम्बिनीमा निर्मित हजार बुद्ध मन्दिरको पूजा कार्यक्रममा सहभागी हुने कार्यक्रम तय भएको छ । ज्ञानेन्द्रको लुम्बिनीमा पूजा बाहेक अन्य कार्यक्रम भएको औपचारिक जानकारी नआएको लुम्बिनी विकास कोषले जनाएको छ। शाह पूजा सकेर आज नै काठमाडौँ फर्कने योजनामा रहेको बताइएको छ ।
मङ्सिर ४ गतेबाट उक्त विहारमा विश्व शान्तिको कामना र विहारमा स्थापना गरिएका १ हजार बुद्ध मूर्तिको प्राण प्रतिष्ठान पूजा चलिरहेको छ। आज उक्त विहारको उद्घाटन सङ्घीय सांसद बाबुदेव घिमिरे, लुम्बिनी विकास कोषका उपाध्यक्ष डाक्टर ल्यारल्केल लामा र उक्त विहार प्रमुख छोक्याइ निमा रिम्पुन्छे गर्ने जनाएको छ ।
